السلام عليكم
اليوم اشارك معكم بعض النشاطات الخاصة بالطفل الرضيع من الميلاد.
لا يخفى عليكم أن اغلب وقت الطفل يقضيه في النوم، ولذلك سنحاول استغلال الوقت المستقطع في بعض الأنشطة التي تنمي حواسه وتخلق رابط عاطفي جميل بينكم.
ولكن أولا سنراعي:
الإستجابة لبكائه
بيت هاديء ومستقر
ولا تنسي أن تراعي مزاجه قبل البدأ بأي نشاط!
هل يريد النوم؟ هل يريد أن يرضع او يغير الحفاض، هل هناك شيء يضايقه؟
إن تأكدتي من مزاجه الجيد فتوكلي على الله 🙂
*ملحوظة: يمكن أن تستمري في عمل اغلب هذة الأنشطة ماعدا الموبايلر حتى بعد بلوغه عامه الأول. بسم الله نبدأ:
موبايلز مونتيسوري
ليا صديقة اسمها دينا أحمد بتعملها وبتبيعها تقدروا تبعتولي اوصلكم بيها
او يمكنك صناعتها بنفسك، ابحثي عن
Montessori Mobiles DIY
أو موبايلز إسلامية اطبعيها من الرابط ده وغلفيها وعلقيها 🙂
ISLAMIC MOBILES
الماساج
حنعمل لطفلنا تمارين عشان نقلل المغص ده غير الماساج البسيط بزيت طبيعي حيساعده ينام أفضل..
للمزيد: baby massage
نقرأ قصص
 |
حتقرأوا كتب سميكة Board books
وقريبا سيكون هناك مقالة عن كيفية القراءة للرضيع |
حتكلميه كتير وتسأليه وتاخدي رأيه وتشرحيله بتعملي ايه وماتحسسيهوش انك بتكلمي حيطة! حتتفاجئي قد ايه ده بينمي اللغة عنده.
اللغة في البداية بتكون استقبالية قبل ماتكون ارسالية.. يعني تطور اللغة عند طفلك مش لما بيبدأ يتكلم، لكن لما يبدأ يفهمك. لو مش بتقوليله يلا ناكل التفاحة ونغسلها ونقشرها وانتي بتبصيله الخ. لما تاخدي رأيه في كل حاجة وتشرحيله اللي بتعمليه، حيتعلم ازاي لوحده؟
زي ما مونتيسوري قالت الطفل عقله ماص بيفضل يمتص كل اللي بيشوفوه زي السفنجة وبعدين يبهرك باللي ماكنتيش متخيلة انه فاهمه او واخد باله منه.
وطبعا ابدأي من دلوقتي بالتسمية قبل الاكل وقول اذكار دخول الخلاء وغيره واهمية قول لوسمحت واتفضل وشكرا.. وكل مايكبر تبدأي تعلميه يشاور وتقولي اسم الشيء وتديه اوامر بسيطة زي هات الكورة او اتفضل الكورة وغيره.
وماتنسيش تغنيله بصوتك.. وه بيكفيه يسمع صوت أمه ومايهموش لو مش بتعرفي تنغمي ^^
 |
| الصابون اللي بيتنفخ بيحبوا يشوفوه ويجروا وراه والموضوع بيستمر لسن كبير |
ممكن تعلقيله صور العائلة جنبه عشان يتعرف عليهم او تعملي كتيب صور العائلة
 |
| يفضل كل صورة شخص وحده |
 |
هذ الكتاب من صناعة صديقتي دينا أحمد
يمكنك أن تفعليه منزليا ولكن بألوان اقل (يفضل ابيض واسود) كي لا يشتت الطفل في هذا السن
|
|
شخاشيخ والعاب لحاسة السمع
كرة تتدحرج بداخلها جرس تحفزه عالحبو
لعبة تصدر موسيقى هادئة بالزمبلك
تساعده في النوم
لعبة بخ
حنلعب بخ ونخبيء العاب ونظهرها. وهذا ينمي عنده فكرة بقاء المادة، يعني مش بمعنى ان حاجة مش باينة انها اختفت للأبد.
حنضحك ونكركر ونعمل اصوات مختلفة ونعمل وجوه مختلفة ونطلع لسانّا عشان يحاول يقلد الحركات دي. في الواقع هذة حركات هامة يستخدمها اخصائي التخاطب،
سنحاول جعل الطفل يقضي وقت استيقاظه على بطنه. وليس اثناء النوم لتفادي خطر متلازمة موت الطفل المفاجيء اللهم عافينا. (لحد مايعرف يقلب نفسه بنفسه، ساعتها ممكن نسيبيه ينام على بطنه إن اراد) لو رافض يقعد على بطنه حتسيبيه كل يوم ٣٠ ثانية زيادة وتحاولي تلاعبيه عشان يحبها وواحدة واحدة حيحبها، زي ما حصل مع صالح وبقى يحب الوضعية دي. ماتصدقوش اللي يقولك مش مهم يحبي المهم يمشي! الحبو يا جماعة مهم جداا وبينمي العضلات الحركية بشكل لا تتخيلوه.
لمعرفة المزيد عن أهمية الحبو من دكتورة اطفال اضغط هنا
من الأشياء اللي حتشتغل على حواسه كمان انك تقعديه على بطنه على ملامس مختلفة، مفرش ملمس حرير، قطيفة، قماشة خشن شوية الخ.
المرآة
خليه يشوف نفسه في المراية. في مونتيسوري ينصح بضع مراية بالعرض عند مرتبته الارضية عشان يتعرف على نفسه( هو في البداية حيفتكر نفسه طفل تاني ويلعب معاه وبعد كدة حيبدأ يتعرف على نفسه. موضوع المراية كمان بينمي عنده الحركة من خلال مراقبته لحركة جسده.
نلعب بعرائس اليد و الاصبع.
 |
عرائس اليد تباع في اديو فن
Edu Fun |
 |
عرائس الاصبع تباع في ايكيا في التجمع الخامس بالقاهرة
Ikea
|
|
اكياس البهارات
تضعي في اكياس من التول بهارات جافة مثل عيدان القرفة
والقرنفل وغيرها وتقربيها من مناخيره لكي يشمها وتنمى عنده حاسة الشم
مرحلة كله على بوقه
لا تخافي او تتوتري إن بدأ طفلك في وضع الأشياء في فمه، فهذا أمر صحي جدا،
فهو يتعرف على البيئة من حوله من خلال فمه، وهذة الفترة ستمتد حتى بعد عمر عام، راعي فقط أن لا تعرضي عليه أشياء ضارة او بها اي مادة كيماوية او منظفات او ما شابه. وعندما يبدأ يحبو، يمكنك أن تٌفهميه بصبر وطول بال أننا لا نأكل الأشياء من الارض وسيأخذ ذلك وقت طويل، لا تملي ولا تتوتري.
اما عض الاشياء بعنف فهذا قد يدل على بوادر تسنين. يمكنك أن تعرضي عليه نوع عضاضة مميزة من المطاط الطبيعي اسمها Sophie la Girrafe هي باهظة الثمن ولكنها العضاضة الوحيدة التي يسهل على الرضيع الصغير مسكها وعضها بسهولة من اي زاوية.
بخصوص مص الاصبع هذا أمر صحي جدا ولكننا للأسف في مصر نتوتر ونخاف منه بشدة بسبب ما نرى من أطفال يمصو اصبعهم لسن كبير. لا تخافي، فهذا أمر فطري، بعض الاطفال نراهم في بطن امهم يمصو اصبعهم! واعلمي انها فترة وستمر مثلها مثل الرضاعة، والشيل والنوم بجانبك. كلها فترات طبيعية ستأخذ وقتها وتمر ببساطة فقط إن لم تضغطي على طفلك او توبخيه. تأثير مص الاصبع على الاسنان لا يبدأ قبل عمر طلوع الاسنان الرئيسية. واخيرا مص الاصبع يُشعر الرضيع بالراحة ويساعده على النوم، وهي أفضل من السكاتة لانها لا تعوق نموه مثلها، ويعتمد على مصدر بداخله لتهدئة نفسه وليس مصدر خارجي.
تنشئة إسلامية
*موبايلز إسلامية (العاب تعلق فوق السرير)
*قراءة قرآن بصوتك/صوت ابيه او شخص مقرب لمدة عشر دقائق يوميا*يفضل عمل كتيب صغير مُغلف به سورة قصيرة من القرآن او اكثر للقراءة سويا
*شراء وتغليف قصص الانبياء للقراءة
*معاد ثابت لأذكار الصباح والمساء
*خذيه معك عندما تصلين، ويفضل أن يرى والديه في صلاة الجماعة.
*قول الاذكار المناسبة عند الرضاعة (ذكر الطعام)، النوم، دخول الخلاء، والاستيقاظ وغيرهما
نمو طفلك عند اتمامه الشهر السادس
الفترة دي المفروض على اتمام الست اشهر يبدأ يعرف يمسك اشياء بقبضة ايده، يعرف يتقلب على جنب واحد، ممكن يكون بيعرف يقعد، تركيزه حيكون اقوى، يبدأ يتعرف عالوجوه ويعرف باباه ومامته، ممكن يعرف اسمه لما تنادي عليه، بيقرب الاشياء لفمه لاستكشافها، حيعرف يقلب نفسه (لو بدأتي معاه بالنوم عالبطن مستيقظا زي ما ذكرنا) وده رابط نمو الطفل بإتمام ال ٦ شهور: milestones 6monthes
ماتقلقيش لو في حاجة مش موجودة من دول عند ابنك، كل طفل له نموه، ومادام عاملة اللي عليكي وبتصبري وبتحاولي بحب كله حيجي في الوقت اللي هو مستعد فيه 🙂
أنتِ
اخيرا استغلي فترات نومه في انك تنامي بقدر الامكان عشان يكون عندك طاقة، تمارسي هواية تغيرلك مودك وتحسنلك نفسيتك. تقرأي عالعموم وفي التربية بالاخص واهتمي طبعا بعلاقتك بزوجك وحاولي ماتقصريش بقدر الامكان وخليه هو كمان يدي حقه كأب في مساندتك مع طفلكم ومساعدته ليكي في واجبات المنزل 🙂
**مصدر اغلب الصور من الانترنت ، ماعدا صوري الخاصة التي أكتب عليها أسم المدونة
*قراءة قرآن بصوتك/صوت ابيه او شخص مقرب لمدة عشر دقائق يوميا
