السلام عليكم
بيتولد الطفل وينركز عالرضاعة والنوم واحيانا الانشطة وبنغفل عن شيء هام جدا، اهم بكتير من عمل انشطة ليه، الا وهي الخروج في الاماكن الطبيعية المفتوحة.
بيوتنا الحديثة مبنية زي الكهف، تحسي ان منافذ الهواء الطبيعي والشمس شبه منعدمة، ولو بيتك بيدخله شمس وهوا ف غالبا برضو مش كافي انه يكون مكان صحي ليكي ولأسرتك. ومع كدة الكهف افضل لانه عالاقل مكان طبيعي من صنع الله مش اسمنت وطوب وبوية صناعية.
الا لو كنتي عايشة في منزل بحديقة بتجلسي فيها يوميا طول النهار.
المهم مش حدخل في موضوع الصناعي والطبيعي دلوقتي عشان ماخنقكمش معايا 😀
خلينا نرجع ان مهم جدا تخرجي ابنك من اول مايتولد!
ايوة اول اسبوع مثلا بعد الولادة مش بعد شهرين ولا ثلاثة!
انا ابني اتولد في يناير في عز البرد، ولولا خروجنا الاسبوعي من بعد اسبوعين (كنت والدة قيصري للأسف الحمدلله) كان زمان اكتئاب ما بعد الولادة اكل فيا وماسابش مني فسفوسة.
طبعا حنراعي صحتهم ولبسهم وجو اليوم 🙂
اهمية الخروج ليكي مش حتكلم عنه كتير، لأنك اكيد ادرى بإحتياجك النفسي ليه، هو اللي حيديكي طاقة تكملي في رحلتك للأمومة الجميلة ذات المسؤولية الثقيلة 🙂
اما بخصوص ابنك فحتفرق معاه جدا، مزاجه حيتعدل وبكائه حيقل. والاهم انه حيتعلم من الطبيعية نفسها، انتي مش محتاجة انشطة وغيره. اصلا اول ٦ شهور او ٩ شهور الانشطة مش حتاخد من وقته كتير، لكن الخروج هو اللي حيشغله ويعلمه ويربطه بالطبيعة من حوله.
حيتعرض للشمس في اوقات ماتكونش حامية قوي، ويتفرج عالشجر ويمسك الورق الناشف في الخريف، والورق الاخضر في الصيف. اديه حتتمرمغ في الرملة او تحسس على خشونة الحشيش. خليه يحبي على ملامس طبيعية، ماتحصريهوش في الحبو في البيت بس عالبلاط والسجاد والخشب.
حتلاقي ابنك جريء ومقدام ومش بيخاف من الناس او الرملة او الحشيش او القطط مثلا.
والاهم انتي.
ماتكونيش انتي اللي وخداه من الطبيعة وقرافه في كل شيء وبتاخدي منه كل حاجة، وتخوفيه من كل حاجة. طبيعي حيتوسخ، حيقع، حيحط حاجة في بوقه.
اكسري حاجز الخوف و التوتر شوية.
مارية مونتيسوري كانت بتتكلم في كتابها إكتشاف الطفل ان الإنسان اصبح يتعامل مع الطبيعة على انها وحش بنخاف منه. نخاف من الهواء والشمس، نخاف من المطر.
سبحان الله مع ان من باب اولى نخاف من المنظفات اللي بتعمل حساسية، وكتمة البيت، والاكل اللي كله مواد حافظة.
بعض الدراسات اثبتت ان الطفل اللي بيحتك بالطبيعة والباكتيريا اللي فيها بيكون مناعته افضل.
ابني بياكل من الارض.. اكيد حياكل الرملة!
صديقة عزيزة ليا مرة قالتلي انها مستنية بنتها تبدأ تمشي عشان تعرف تخرج بيها. طيب انتي متخيلة انها لما تبدأ تمشي مش حتحط حاجة في بوقها من الارض فجأة كدة؟!
سبحان الله كل مالطفل يتمنع من الاحتكاك بالبيئة من حوله، وكل حاجة بتتشد من ايده، وكل مايقرب من حاجة يتشال فجأة بدون انذار ويقعد يصرخ ويعيط. كل ما حيكون طفل حواسه نموها اقل ، وهو ده الطفل اللي بيكون عنده ٣ سنين ولسة بيحط حجات في بوقه وبيبلعها.
أنا بدأت اسيب صالح يحتك مباشرة بدون تدخل مني ويحبي في الطبيعة كان وهو ٦ شهور، لكن لو رجع بيا الزمن كنت نيمته على ملاية عالرملة او الحشيش من وهو ٤٠ يوم مثلا.
وقت الاستلقاء عالبطن
Tummy Time
من المميزات اللي بفخر اني عملتها والتزمت بيها هي اني كنت بحط ابني على بطنه من عمر شهرين ونص (وهو صاحي مش نايم لانه خطر). هو الموضوع ده صحي جدا وهام جدا جدا عشان الطفل ينمي عضلاته استعدادا للحبو.
أنا من الناس اللي ضد اجبار الطفل، بس قرأت عن اهمية النوم عالبطن اثناء الاستيقاظ ولذلك بدأت احط ابني على بطنه وانا قدامه وافضل الاعبه وهو يسكت لحظات وبعدين يشتكي، كنت بحاول الاعبه ومازودش عن دقيقة عشان ماضايقهوش، وكل يوم اعمل كدة، الاستجابة كانت بطيئة كل يوم او يومين يزود ثواني او دقيقة بلا تذمر، ويوم بعد يوم الدقائق زادت، لحد ما بقى يحب وضع البطن جدا.. وهوب قلب نفسه 🙂 ودي كانت بداية التطور الحركي عنده.أنا حبيت اضيفلكم الموضوع ده لأن ناس كتير اعرفها بتكسل تحاول مع اولادها، وبتعتبر ان عدم الحبو ده مش مهم، وبيكونوا مكسلين يقعدوا قصاد الرضيع وهو على بطنه او خايفين من برودة الارض. بس زبطوا اموركم وعوامل السلامة لأولادكم لأن الحبو في غاية الأهمية لنمو الحركي والعضلي والعصبي، واللي يقولكم غير كدة هو غلطان. وشوفوا كم الابحاث اللي اثبتت كدة.
نرجع تاني لموضوع الخروج.
لما ابنك يحط حاجة في بوقه خديها بشويش وقوليله لا، وبالتدريج وبدون ضغط وعصبية حيبدأ يستوعب، وتديه دايما بدائل.
طنشي احيانا، يعني لو مرة حط رملة في بوقه نفضيها بالراحة وماتتوتريش لو فيه شوية مالحقتيهومش.
كنت لسة واخدة صالح عالبحر من شهر، وكان بقاله طول الشتاء ماشافش رملة بحر. كان مبسوط قوي وبيحطها في بوقه، كنت بفضل اشيلها واقوله ده مش أكل يا صالح، وجبت اكله وقعدت ااكله عشان يفهم، اقوله ده اكل، الرملة مش اكل، شوية بعد ماستكشفها بطل ياكلها وقعد يلعب فيها.
ايوة ابني لحد دلوقتي بيحط الحاجة من الارض في بوقه، بس فيه تطور كبير مع متابعتي، والاهم مراقبتي المستمرة.
ماتقوليش انا بخرج ابني وهو محبوس طول الوقت في عربيته، او حتى الشيالة. سبيه يستكشف العالم من حوله وعينك ماتغيبش عنه لحظة. وطبعا تكوني في مكان نظيف بأكبر قدر ممكن.
مش عايزة انسى بعض الامهات اللي بتكسل تخرج وحابسة اولادها صيف شتاء في البيت. وايا كانت الحجج ف دائما ردودها بتكون تعجيزية لنفسها قبل غيرها. “إن شاء الله لما اسوق، اصل الخروج بمواصلات صعب!” وهي عارفة انه مستحيل تسوق في الفترة دي مثلا. وحتى لو بتسوق اللي مكسل، مافيش اي حاجة حتخليه يقدم غير العزيمة الداخلية .. الكلمة دي سمعتها من كمية امهات لا تحصى ولا تعد.. او احيانا الرد بيكون، محتاجة حد يشجعني.. والواقع انتي لو حد
جالك شجعك حتهربي منه برضو! ارجوكي الكسل وحش ليكي ولاولادك
جالك شجعك حتهربي منه برضو! ارجوكي الكسل وحش ليكي ولاولادك
حبستك لنفسك واولادك زي السجن بالظبط، ماتستغربيش من عدم نمو امور كتير عندهم، ماتستغربيش من شقاوة زايدة، ماتستغربيش من سلوكيات غريبة، ماتستغربيش لعدم تجاوب في النشاط او الدراسة. اسألي نفسك الاول انا اديتهم حقهم في التنفس كأطفال ولا لا؟! قبل ماتطالبي منهم يكونوا تفصيلة جاهزة للطفل المثالي، اديهم حقهم في كونهم اطفال محتاجين يجروا ويلعبوا.
ارجوكي الخروج يعني تكراااار. ماتقوليش
“انا بخرجه فعلا ، انا خدت ابني حديقة الحيوان من ٤ شهور.”
طيب وحتدويه تاني امتى؟
“الصيف الجاي ان شاء الله؟!”
الطفل بيتعلم بالتكرار. والتجربة الايجابية عند الطفل هي اللي بتتكرر وبتصبح عادة.
اخيرا، تقدروا تودوا اولادكم حدائق عامة، حدائق اطفال، شواطيء، تقدروا تشيلوهم في الشيالة في حديقة الحيوان او مكان مش نظيف. غير كدة سيبوهم يحبوا عالرمل والحشيش.. سيبوهم يحتكوا بالطبيعة زي بقية اطفال العالم على مدار القرون 🙂 وعينكم ماتغيبش عنهم لحظة <3
للمزيد من المقالات
للتواصل ومناقشة ارائكم في التعليقات او المجموعة عالفيسبوك:
مصادر:
مقال مفيد و محترم