وانا طفلة كنت شخصية فنية جدا. كنت بحب الرسم وكل النشاطات الفنية. ولأن أمي (ربنا يبارك فيها) خريجة فنون وشخصية عندها احساس فني عالي فكانت دايما بتشجعني ارسم والون وكانت دايما مرحبة بميولي دي. بس ده كان كل اللي بنعمله، نفس الانشطة وبس.
فضلت اعمل نفس الانشطة لحد مازهقت منها وزهقت من عدم التطور وزهقت من اني محلك سر فيها. ماحدش وداني مراكز متخصصة او جابلي حد يتبنى الموهبة دي، ولذلك شغفي قل وماناماش، وعدينا الفترة الحساسة بدون اي تطور، وبالتالي انتهت.
أنا دلوقتي عندي عقدة من ساعتها
أنا دلوقتي عندي عقدة من ساعتها
الجزء الفني اللي جوايا بيوجعني قوي انه موجود ولكن مش متنمي.
المشكلة ان دي كانت فترة حساسة عندي، ولاني ماحسيتش بتطور وقتها ، الفترة خلصت وفرصتي للتطور قلت جدا.
الفترة الحساسة دي هي الوقت اللي الطفل بيكون عنده ميول وشغف عالي جدا انه يتعلم شيء ولو اتمنع منه او ماتعلموش او ماحدش ساعده انه ينمو فيه، بالتالي صعب جدا انه يتعلمه بعد كدة. ورغبته فيه حتقل.
مثال بسيط، الفترة الحساسة الأساسية عند الطفل للحركة بتكون اول مايتولد لحد سن عام ونصف، ولذلك اللي مش بيضع الطفل وهو صاحي على بطنه يلعب بعد الاربعين وكل وضعياته على ظهره في الاغلب مش بيحبي، وظاهرة تأخر الحبو واحيانا تفويتها خالص معروفة، واطفال كتير مش بيحبو اصلا وبيدخلوا عالمشي على طول (وفيه دكاترة بتقول عادي لكن الحبو له اهمية عالية في التطور الحركي والعضلي للطفل).
وكذلك اللي بيقعد الطفل في كرسي او عربية لفترات طويلة هو بيعيقه على تنمية الحركة عنده.
مثال اخر، الفترة الحساسة دي ممكن لما تلاقي ابنك مثلا بيصب الماية ويدلقها في البانيو، دي فترة حساسة انك تعلميه الصب وانه ينفذ نشاط الصب بتاع مونتيسوري.
طيب اعرف الفترة الحساسة دي ازاي؟
بنلاقي الطفل عنده شعف لحاجة معينة، مش بيبطل يعملها ويفضل يعيد ويزيد فيها منغير مايزهق، تلاقيه عايز يعملها كل يوم، ومايسيبهاش غير لما يكون اتعلمها واتقنها.
حتى تلاقي نفسك مثلا بتقولي لبنتك انتي مازهقتيش من غلق وفتح الشباك مثلا؟! ايوة ممكن جدا دي تكون فترتها الحساسة لغلق وفتح المقابض مثلا
لو انتي ماستغلتيش كل فترة بنتك او ابنك عندهم شغف في امر ما، حيفقدوا الرغبة فيها بنسبة كبيرة بعد كدة حيكون صعب قوي تعلمها فيما بعد. عشان كدة ماتستغربيش لما يكبروا ويرفضوا ينظموا غرفتهم او يرجعوا طبقهم المطبخ مثلا، لان حضرتك ايام فترتهم الحساسة للنظافة والنظام كنتي بتمنعيهم او تسخري منهم او تقللي من كل اللي بيعملوه!
الفترة الحساسة للنظام من ١٢ شهر حتى٦ سنوات ( مروة رخا)
الفترات الحساسة دي مهمة جدا، راقبوا عيالكم (من الميلاد) وحاولوا تفهموهم عشان
تلاحظوها وتستغلوها صح 
🙂
🙂ده تفصيل للمراحل الحساسة عند الاطفال قد يبدأها قبل او بعد من مدونة دعاء مجدي:
