ولادة طبيعية بعد قيصري: تجربتي و ازاي أنتِ كمان تقدري

أميرة حلمي 08/12/2019

0 167 11 دقائق

قصة ولادتي الطبيعية بعد القيصري: الجزء الأول

My VBAC Story: Part 1

من بعد ماولدت صالح بكام يوم وأنا بقول يارب أكتبلي ولادة طبيعية في تاني مرة. أتعقدت جداً من الولادة القيصري من ألم جسماني ونفسي وكنت بتمنى إني أجيب طفل بالطريقة الطبيعية اللي ربنا خلقنا عليها بنولد بيها أطفالنا من ألاف السنين. مرت ٣ سنوات وحلمي مازال قائم والمرادي عايزة أحققه مع حملي الجديد. من أول الحمل وأنا عندي قرارات مهمة متخذاها ، زي اني اقرأ واعتمد على نفسي كمصدر علم وماثقش في أي شخص قريب أو بعيد أو متخصص بشكل كامل، اني أتابع حملي مع دولا وأولد معاها كمساعد للطبيب، اني اتحرك، اني ماخدش تخدير في الطلق

والولادة، ان البيبي يطلع مني على حضني وماحدش ياخده الا بعدها بشوية، وان ابني ماياخودش اي رضعة صناعي.

الحمل الثاني بالنسبالي كان أثقل عليّ من الحمل الأولاني، يمكن لأني حملت في طاهر وأنا أزيد ب ١٠ كيلو؟ أو يمكن لأني كأم المرادي جسدياً تعبانة؟ أو يمكن السن؟! ماعرفش. المهم على قد ما هو كان حمل “وهن على وهن” بس حاولت أتعامل معاه بشكل إيجابي، أقرأ كتب ومقالات و أشوف فيديوهات عن الولادة الطبيعية، اتحرك بقدر الامكان ولو في البيت، مانامش على ظهري، أعمل تمارين لما تيجي الفرصة، استرخي وأعمل تمارين النفس كل مايجيلي ضيق نفس (مهم جداً للتدريب عشان وقت الطلق والولادة)، وغيرها من الأشياء… لكن الحقيقة واجهتني مشكلة في الشهر الثامن وهي إن طاهر كان وضعه مش مناسب للولادة، كان ظهره لظهري ووشه لبطني والمفروض العكس ظهره يكون لبطني ووشه لظهري، دي كانت أكبر مشكلة واجهتني، فضلت أعمل تمارين عشان أعدل وضعه، حتى هبة حامد الدولا جاتلي يوم وقعدنا نعدل في وضعه لحد ماتحرك شوية وظهره بقى لجنب بطني وده وضع مش سيء، سهل يتعدل وقت الولادة.

ماكنتش بروح للدكتورة كتير في التاسع عشان مش عايزة اعمل سونار كتير لكن لما روحت في أخر التاسع لقيت إن طاهر رجع أخذ الوضع اياه، ظهره لظهري.. قلت في نفسي مش مشكلة وحيتعدل وقت الولادة إن شاء الله.. فضلت مستنية الطلق الطبيعي يجي وبعمل كل النصايح بتاعة التحفيز الطبيعي من تمر وتمارين ومش وغيره لكن مافيش نتيجة.. دخلت في العاشر وأنا مسترخية عشان عارفة إن في دول بتنصح بالإنتظار اسبوعين في العاشر لحد مالطلق يجي لوحده.. لكن كنت تعبانة وزهقانة وكان بدأ ينتابني الشعور إن جسمي غريب هو ليه مش عايز يجيله طلق لوحده! على نهاية الأسبوع الأول في العاشر عملت أشعة على سمك جدار الرحم ٥مم وكشف النسا بين إن طاهر مانزلش الحوض ووضعه مش حلو،، كنت محبطة وبعيط وقعدت ادعي كتير وبفتكر يومها كذا حد قالي شكلك حتولدي قيصري! يومها قرأت سورة البقرة كاملة وقعدت ادعي و قررت إن تاني يوم حاخد خروع عشان يجيب طلق زي ماعملت في صالح.

سبحان الله ثاني يوم صحيت ١٠:٣٠ لقيت عندي مغص خفيييف جداً، قلت لعله المغص اياه اللي بيجي ثواني بقاله فترة، لكن سبحان الله مع نزول الغشاء المخاطي قبلها بيوم طلع فعلاً المغص ده بداية طلق طبيعي و ماحتاجتش أخذ خروع! بفضل الله وكرمه فضلت اتحرك طول ما المغص كان خفيف وبروق البيت وبشوف صالح ، ومع شدة المغص بدأت اركز في تنظيم نفسي شهيق وزفير طويل مع الإندماج او التركيز عالمغص. حوالي ٧ دقائق الفرق بين كل طلقة .. الطريقة دي خليته محتمل جداً الحمدلله. بعد كام ساعة والدتي جت اخدت صالح عندها، وزوجي جه من الشغل يقعد معايا. كل ده وهبة بتابع معايا بالتليفون لحد ماجاتلي الساعة ٩ مساءً .. الساعات اللي بعدها الألم بدأ يشد جامد لكن مع النفس السليم والأوضاع المريحة كان محتمل.. لحد بعد ٧ سم الألم بدأ يبقى يشد جداً وأحتاج مساعدة. في الوقت ده هبة الله يكرمها كانت بتضغط على منطقة الألم بإيديها وهنا كانت أخر مراحل الطلق بمعنى فرق كل طلقة والثانية دقيقة والطلقة نفس المدة. نزلنا من البيت للمستشفى في أخر لحظات الطلق و عبدالله بيقف بالعربية كل ماتيجي طلقة ، حتى لما وصلنا المستشفى كنت بخليهم يقفوا بالكرسي المتحرك مع كل طلقة!

طلعنا الغرفة ودكتور نسرين يسري ربنا يكرمها كانت موجودة وعملنا كشف بالسونار برضو طاهر عالي ومتبت على وضعه.. في اللحظات دي أنا ماكنتش عايزة ادي للأحباط اي مجال.. لكن الألم كان بدأ يتعبني جامد وقررت اني اخذ تخدير مع اني ماكنتش ناوية على كدة.. اتفقنا نجرب اعمل تمارين في المرحلة دي حوالي ٩ سم وأنا ماكنتش قادرة لكن عبدالله وهبة شجعوني وبفضل الله قدرت اتحمل واعمل التمارين لكن برضو ماعدلتش وضعه او نزلته الحوض.. اخدنا بعضنا وروحنا غرفة العمليات وأنا متفقة على حتمية وجود هبة معايا. اخذت البنج من هنا وحسيت براحة فظيعة من توقف الطلق وطلبت منهم ماحدش يسيبني انام… لحظات غرفة العمليات دي كانت مليانة دعاء لا يتوقف وذكر فعلاً لساني مش بيتوقف عن ذكر الله والدعاء حتى اني استخرت ربنا لو مش عايزين اولد طبيعي قدرلي الخير مع إن من جوايا بقول يا رب بعد العشرة سم اولد قيصري ! قعدوا يزقوا طاهر لتحت شوية و يحاولوا بكل الطرق ولسة عالي.. الدكتورة تقولي يا أميرة نفتح قيصري أقولها اصبري يا دكتور مادام صحته كويسة خلينا نفكر.. الحل الوحيد كان فيه مجازفة لكن ده كان تدبير ربنا واختياره لأني فعلاً سلمت أمري ليه وقتها.. نشق العجان ونشفط بالجيفت، يارب لو ده في خطر على طاهر قدر الخير يا رب.. وفي غمضة عين لقيت ثقل على بطني! ايه ده؟! ده طاهر في حضني يا الله سبحان الله يارب! بجد لحظة إعجاز لحظة الولادة سبحانك يا رب مش قادرة ابطل أقول الله أكبر وابكي وطاهر في حضني بالدم بكل حاجة وبيبكي وبحاول اهديه .. حالة من الفرحة والإنتصار و إن الله لا يضيع أجر من أحسن عملاً .. الحمد والشكر لك يا رب.

أول كلمة قلتها لطاقم التمريض بعد ما خدوا طاهر بعد ربع ساعة كدة و بدأوا ينقلوني من غرفة العمليات.. قلتلهم الحمدلله اننا مسلمين.. الحمدلله على نعمة الوكيل اللي بتوكليله أمرك وتسيبي أمورك عليه خلاص يا رب لا ملجأ منك إلا إليك.

ولادة طبيعية بعد قيصري مع المشاكل اللي حصلت دي اللي ماكانش ليها علاقة بالقيصري ومع كدة نجحت بفضل الله. الطبيعي فطرة ربنا ماتحرميش نفسك منها..

عايزة اقولك إن الطلق مع الإستعداد النفسي والنفس الصح والقوة والإيمان بيعدي وبيتنسي!

وايوة الشق متعب بعد الولادة ، لكن مش شرط يحصلك زيي لو وضعك كويس ممكن ماتحتاجيش شق لو دكتورك مش بيعملها بشكل روتيني..

كوني بطلة قصتك مش حد تاني، وخودي زمام أمور حياتك، ولو حترمي حملك على حد ارميها على ربنا مع سعيك الحقيقي.. مهما كان دكتورك ممتاز وسمعته حلوة ولو معاكي بدل الدولا اتنين، لو أنتِ ماشتغلتيش على نفسك مافيش حاجة أنتِ عيزاها حتحصل لوحدها!

تنويه: دي قصتي مش واجب عليكي تقلديها في الأخر كل شخص مسؤول عن قراراته بناء. عن فهمه وبحثه وقراءته زي ماقلتلك اعتمدي على نفسك وخدي زمام أمورك مش بوست يجيبك ويوديكي ودكتور يوترك ويهنج مخك عن التفكير.. أنتِ تستطيعين بسعيك وتوكلك على الله

طيب ازاي بقى أقدر أولد طبيعي بعد قيصري؟!

حقولكم عوامل مهمة وأساسية لتحقيق هدفي وحشارك معاكم إحصائيات وأرقام مدروسة عشان الكلام يكون علمي وبدليل لكل شخص بيهتم بالموضوع ده..

طيب الأول هو ممكن أولد طبيعي بعد قيصري؟ ده أكيد ! اللي يمنعك من انك تولدي طبيعي هي لو عندك مشاكل في حملك وده مالوش علاقة بالقيصري اصلا أو نسبة حدوث قطع في جدار الرحم لا قدر الله وده نسبة حدوثه أقل من ١٪؜ ، ولو لا قدر الله كنا ال ١% دي ف لو أنتِ مع دكتور شاطر ومستشفى محترمة ف عندك حوالي ٤٠ دقيقة يتم إنقاذ فيها الموقف.

قدرت بفضل الله أحط شوية نقط أساسية مهمة حتساعدني في الرحلة دي، أهمها اني أشوف قصة حقيقة حصلت ؛ زي قصة صديقة ولدت طبيعي بعد قيصري ما شاء الله في إسكندرية من فترة قصيرة مع دكتورة نسرين .. فكرة تواجد شخص بيوجهك ويساعدك أيام الحمل والرضاعة وهي مهنة جديدة رائعة اسمها دولا (مش داية)، المتابعة مع دكتور مدعم الفكرة وقلبه جامد، اني اعتمد على نفسي ومارميش حملي على دكتور أو دولا وإنهم اللي معاهم المفتاح السحري لأحلامي! القراءة والبحث الحقيقي المستفيض، اني ماقعدش أفكر في الحوادث اللي ممكن تحصل بنسب قليلة جدا، و تحديد خطة ولادتي بإختياري مش بإختيار اي شخص أخر، وأهم شيء إن يكون عندي ثقة في الله

كبيرة جداً.

١– التجارب الناجحة مش حكر عالأجانب

تجارب صديقات أخرهم ماكانتش بتعمل اي استعدادات لكن ربنا قدرلها تولد طبيعي بعد قيصري و أمهات صديقاتي اللي ولدوا طبيعي بعد قيصري من أكثر من ٢٠ سنة!

كنت في جروب عالواتس أب (للأسف مغلق مش بيرضوا يضيفوا حد) قابلة إنجليزية مسلمة كانت بتدعم أمهات عايزين يولدوا طبيعي بعد قيصري. أغلبهم كانو أمهات من الهند وباكستان و مغتربات في إنجلترا و السعودية. الحقيقة إن الأمهات دول كانوا مبهرين بشكل لا يوصف في قصصهم من ولادات طبيعية بعد قيصري ناجحة مع وجود مشاكل كتير بل نصفهم كان بيولد في البيت في إنجلترا! من الشروط المنتشرة عشان تولد طبيعي بعد قيصري إن يكون في فرق سنتين بين الطفلين، و إن جدار الرحم يكون مش أقل من ٤ مم و إن البيبي يكون وزنه مش أكثر من ٣.٥ كيلو… لكن في الجروب ده هما كانو مؤمنين إن مافيش حاجة اسمها شروط! بنات ولدوا في فرق أقل من سنة و ماقاسوش جدار الرحم أصلاً وفي ولادة عيال وصل وزنهم ل ٥.٥، وفي استنو الطلق يجي طبيعي في العاشر..

القصص دي عشان حقيقية ف اديتني قوة عظيمة .. كمان لانهم مسلمات ودايما بيستعينوا بالله شيء عظيم جداً اللهم بارك ❤️

.. الفكرة في الثقة واليقين والدعم والشجاعة.

٢–يعني ايه دولا؟

مهنة جديدة عظيمة!

مهما كان عندك دعم فالدولا وجودها لا غنى عنه من وجهة نظري.. في ولادتي الثانية الطبيعية زوجي الله يبارك فيه ويحميه كان بيساعدني في الطلق بشكل إيجابي جداً و علاقتنا زادت قوة لما لقيته واقف جنبي في أوضاع أزواج كتير يتقرفوا منها زي وأنا برجع ولا بدخل الحمام ! لكن في أخر الطلق بعد مافتحت حوالي ٦ سم والألم كان زايد جداً وفرق الوقت بين الطلق حوالي دقيقة، في الوقت ده هبة كان وجودها ضروري وفرق معايا حد السماء بفضل الله. هبة حامد الدولا اللي عندها خبرة أكثر من ٦ سنين كانت جمبي بتضغط على أماكن الطلق عشان تخففه عني وفضلت معايا كدة واحنا في العربية رايحين المستشفى، لما فرق الطلق كان أقل من دقيقة. وجودها ومساعدتها ليا في إتخاذ القرارات ووجودها في غرفة العمليات عمالين ندعي ونقرأ قرآن ونفكر في حلول للمشاكل اللي بتحصل من ارتفاع البيبي وعدم نزوله الحوض ووضعه المعكوس.. وجود هبة أنها تتأكد إن خطتي ماشية صح في لحظات ضعفي زي إن طفلي يطلع من بطني على حضني (لو صحته كويسة) مش ايد دكتور الاطفال او انه ما ياخدش صناعي أو غيرها من توصياتي. حقيقي من أفضل القرارات اللي اتخذتها وجود دولا جنبي

٣– أهمية وجود طبيب بيدعم فكرة الطبيعي بعد القيصري ومش بياخدك على قد عقلك ويزنقك في وقت انك لو ماجالكيش طلق اخر التاسع حفتح قيصري او يقعد يخوفك من حجات كتيرة. متابعتي مع دكتور نسرين يسري كانت لعدة أسباب أهمها إن بالفعل ليا صديقاتي ولدوا معاها طبيعي بعد قيصري، و ٤ تانين ولدوا طبيعي كبكريات ولكن ولادات كانت إيجابية في بعضهم محتاجوش لشق عجان لأنها بتعملها للحاجة فقط مش إجراء روتيني. صبرت معايا أسبوع في العاشر (وده أمر طبيعي دول زي إنجلترا بيستنوا اسبوعين واحيانا أكثر)، كانت متقبلة حريتي في إني مش بحب أعمل سونار كتير وما إلى ذلك، دعمها لتأخير قطع الحبل السري و طلوع الطفل في حضنك مباشرة، وجود هبة حامد الدولا معاها كفريق ممتاز. وأخيراً والأهم انها كانت مدياني حقي في غرفة العمليات من المشاركة في إتخاذ القرار، لأن في الأخر ده جسمي والطفل ده ابني وأنا مش حقل تجارب حد ينفذ فيا اللي عايزه لازم يكون ليا رأي واتناقش مع الدكتور فيه، وده مش معناه إن الدكتور حيسمع كلامك لو اقتراحك مش أمان لكن حتتكلموا وتحاولوا توصلوا لحلول لما يكون في مشكلة.

٤– ارجوكي ماتعتمديش إن الدكتورة هي اللي حتحققلك أحلامك، لو أنتِ مش محضرة نفسك كويس من علم ودعم أشخاص وقوة في نفسك والأهم إيمان ويقين وإستعانة بالله، ف أنتِ مش حتنجحي!!

بدأت بقراءة كتاب أماني بيرث صديقتي سلفتهولي وده كان كتاب صغير بالعربي مكثف عن معلومات مهمة تفصيلية في الولادة الطبيعية.

ثم قرأت كتاب عظيم فرق معايا حد السماء من أشهر الكتب عن الولادة الطبيعية بتاع قابلة أمريكية ممتازة اسمه

‏Ina May’s: Guide to ChildBirth

https://drive.google.com/file/d/1KOM5VoCpNUsQcjUdKt3ov_FH8ZIN9aBe/view?usp=drivesdk

وده أجمل حاجة فيه إن نص الكتاب قصص ولادة طبيعية بالكامل ناجحة مع كل التحديات، ولادات طبيعية بكرية لبنات فوق ٣٥ و ٤٠، ولادات بوضع بيبي مختلف، ولادات طبيعي بعد قيصري لأطفال أحجامهم كبيرة ولادات كثيرة بدون شق عجان، وكل الولادات خارج نطاق المستشفى في مركز ولادة طبيعية في أمريكا.

الجزء التاني من الكتاب فيه نصائح عن التدخلات الطبية وأضرارها وأمتى تكون ضرورية وهكذا.

Bridget Taylor فيديوهات دولا مفيدة جداً عاليوتيوب اسمهاhttps://www.youtube.com/channel/UCsqMRhkuuI5aiJAVxgUpgbQ

بعض فيديوهات رولا قطامي عاليوتيوب.. مش كل تفكيرها مناسبني لأني ضد الإستعجال في التدخلات الطبية.

موقع وكورس(ماخدتش الكورس للأسف) سبينيج بابيز

Spinningbabies.com

٤– اللي يخاف من العفريت يطلعله

ماكنتش بحب أفكر في موضوع إن الجرح ممكن يتفتح لأنه بنسبة أقل من ١٪؜ بل وقد تحدث لواحدة ماولدتش قيصري قبل كدة. بشوف اني لو حفضل اركز عالسلبي حيتحقق. لو فضلت مركزة إن وضع طفلي في بطني وحش مش حولد طبيعي! واللي فرق معايا جدا كان كتاب “العقلية” للمؤلفة كارولدويك، بحب دايما ابدأ بيه في كورساتي التربوية عشان نغير عقليتنا لعقلية منتجة بتقوي بالتحديات ومش نحبط من العوائق

٥– خطة الولادة والتحكم في حملك وولادتك

بعد القرائات والبحث كتبت خطة الولادة واتناقشت فيها مع دكتورتي والدولا عشان يكونوا عارفين أنا عايزة ايه في ولادتي.. أبحثي عن خطة الولادة عشان تفهمي أكثر

Birth plan

٦– التعامل الفعال والإيجابي مع الطلق وثقافة التعايش مع الألم وتقبله مما يؤدي لتخفيفه فعلياً

الموضوع ده استفدت منه جداً من فيديوهات الدولا بردجت تايلر اللي حطيت رابط قناتها فوق، كانت عاملة فيديوهات بتتكلم فيها عن مراحل الطلق وتتنفسي ازاي فيهم. ضروري تشوفيهم . خلينا متفقين إن كل واحدة بيجيلها الطلق في مكان مختلف، في بيجي في الظهر او الفخاد او البطن الخ

المرحلة الأولى من ٠ ل ٣ سم .. الألم بيبدأ بمغص خفيف أضعف من مغص الدورة وبيبدأ يشد. المرحلة دي محتملة جداً مهم فيها انك ماتروحيش المستشفى وتتحركي و تاخدي نفس عميق مع كل طلقة وتطلعيه بالرحة من بوقك.

المرحلة الثانية بتكون حوالي بعد ما بتفتحي ٤ سم وبتكون أشد شوية وفيه بيفضلوا يروحوا المستشفى في الوقت ده بالذات لو بعد قيصري للأمان، والبكريات بيفضلوا يروحوا المستشفى في أخر المرحلة دي. تنظيمك للنفس زي ماقولنا شهيق وزفير عميق وتركيز عالطلق كأنه موجة بتعدي في جسمك حيهونها قوي.. حجات زي الماساج من مرافقك في أماكن الطلق بيهون جداً.

أخر مرحلة قبل الولادة بتكون من٦ او ٧ سم ل ١٠ سم ودي بتكون شديدة وسرية وفرق بين الطلق صغير ولازم تكوني وقتها في المستشفى. النفس والتركيز مع الطلق كموجة والماساج والاستعانة بالله نصيرك.. هانت دي أخر مرحلة قبل خروج البيبي.. المرحلة دي في بياخدوا فيها ابيديورل لكني ماحيتش اخده لأضراره المحتملة وكذلك ساعات بيعيق تقدم الطلق

أخيراً خروج البيبي

طبعاً ده بإختصار شديد شوفوا الفيديوهات و أقرأوا أكثر عن مراحل الطلق أو stages of labor

الفيديوهات اهي مهمة جداً وتفصيلية شغلي الترجمة الانجليزية عشان تفهمي أفضل

https://www.youtube.com/playlist?list=PL2bUz_06Mnlt3HI3LM_7kyN8Ny0aMu7Yn

٧– الحمدلله على نعمة الإسلام

أول حاجة قلتها لممرضات بعد ماحضنت طاهر شوية وهديته وخدوه،، الحمدلله اننا مسلمين! الحمدلله إننا مؤمنين بوجود خالق قادر على أن يغير أحوالنا من حال الى حال.لحظات ما قبل ولادة طاهر ماكنتش تخلو فيها ربع ثانية بلا دعاء وتسبيح وتهليل وتكبير حتى في لحظة لما كنا خلاص حنفتح قيصري وقلتلهم استنوا مش هو صحته كويسة خلينا نفكر في حلول! دعيت دعاء الإستخارة وبعدين قلت يا رب خليني اتقبل لو أنت مش عايزني أولد طبيعي. طول حملي وأنا بدعي في كل سجدة وبطلب من كل شخص طيب انه يدعيلي أولد طبيعي طفل بصحة وعافية. كنت بقرأ يوميا سورة يس بنية تيسير الأمر و الصدقات والتسبيح والحمد والتكبير والصلاة على رسول الله. ولما عديت أسبوع في العاشر وضاقت بيا السبل وقعدت أبكي الطلق مش بيجي ووضع طاهر مش حلو في بطني وعالي ، قرأت البقرة كاملة قعدت ادعي ربنا ييسرلي أمري، حتى وقت الطلق ما جالي في الأول كنت بقرأ سورة البقرة .

٨–طيب وليه وجع الدماغ ده كله ماولد قيصري وخلاص؟

ماكدبش عليكي التعب اللي تعبته من إستخدام الجيفت و الخياطة خلاني أشعر انه قريب جداً من القيصري.. وده للأسف اللي ماكنتش مستعداله بشكل صحيح! لكن الحمدلله مفيش حاجة بتيجي بلا ثمن.. أكبر ميزة لنجاح الولادة الطبيعية هي إن لو ربنا قدرلي ولادات أخرى ف أنا ماشية في طريق أمن أكثر من القيصري بكتير وإني كشخص مؤمن بشدة بفطرة الله التي فطر الناس عليها إني أعملها بالفعل ومالجئش لتدخلات الإنسان بلا داعي قوي! لكن لو أنتِ مش فارق معاكي و أحب أقولك إن القيصري متعب جدا. ف رجاء ماتختاريهاش بنفسك بالذات لو أنتِ بكرية! لكن لو تاني قيصري وحابة تكرريه فعندي ليكي نصيحتين مهمين جداً ماتتنازليش عنهم وحيفرقوا معاكي ومع ابنك سنين قدام… أولا انه لو طلع بيعيط ونفسه سليم وكله تمام انه يجي في حضنك مباشرة ويقعد مثلا ربع ساعة skin to skin قبل ماياخده دكتور الأطفال، ثانياً أخري قطع الحبل السري لحد ما النبض بتاعه يقف لأنه بيستمر في مد الطفل بفوائد، ثالثاً والأهم بعد ال Skin to Skin انك توصيهم وتحلفيهم ١٠٠ يمين مايدوهوش نقطة لبن صناعي ، ماتقلقيش لبن السرسوب حيجيلك من أخر حملك مش وقت ولادتك ، لكن الرضعات الصناعي هي اللي بتعمل التباس عند الطفل وأغلب مشاكل الرضاعة اللي بتحصل للأم بعد كدة بتكون لهذا السبب المأسوي.. وفي أبحاث أثبتت إن الرضاعة كتير أول ٢٤ ساعة من لبنك بتقلل من حدوث الصفرا العكس! (المصادر كلها في كتاب الرضاعة للقابلة أينا ماي)